ރައީސް މުހައްމަދު މުއިއްޒު އިޢުލާންކުރެއްވި ދުންފަތް ބޭނުންކުރުން އެކީ ހުއްޓާލާ ރަށްރަށުގެ މީހުންނަށް އެލަވަންސެއް ދޭން ވިސްނާ ހިޔާލަށް ވެލިދޫ ކައުންސިލްގެ ރައީސް އާތިފް ހުސެއިން ފާޑު ވިދާޅުވެއްޖެ އެވެ.
އޭނާ ފޭސްބުކުގައި އެކަމަށް ފާޑު ވިދާޅުވަމުން ވިދާޅުވީ، އެ އެލަވަންސުގެ ބަދަލުގައި ރަށްރަށުގެ ރައްޔިތުންނަށް އަސާސީ ހިދުމަތްތައް ފޯރުކޮށްދިނުން މާ މުހިންމު ކަމަށެވެ. އޭނާ ވިދާޅުވީ ރަށްރަށުގައި އަދިވެސް ކަރަންޓާއި ނަރުދަމާގެ ހިދުމަތް ނުލިބި، ސާފު ބޯފެން ނުލިބި، އަދި ސިއްހީ ހިދުމަތްތަކާއި ބޯހިޔާވަހިކަމުގެ ހައްގުން މަހުރޫމްވެފައިވާ އެތައް ބައެއް ތިބިއިރު، ދުންފަތް ހުއްޓާލާ އެލަވަންސް ދިނުމަކީ އިސްކަންދޭންވީ ކަމެއް ނޫން ކަމަށެވެ.
"ހެޔޮނުވާނެ. ރަށްރަށުގެ ރައްޔިތުންނަށް ބޭނުންވާ އަސާސީ ހިދުމަތްތައް ގާއިމުކޮށް އެ ހިދުމަތްތައް ރަނގަޅަށް ލިބުން މާ މުހިންމު،" އާތިފް ވިދާޅުވި އެވެ.
އޭނާ އިތުރަށް ފާހަގަކުރެއްވި ގޮތުގައި މާލޭ ސަރުކާރުން ރަށްފުށުގެ ރައްޔިތުންގެ އަސާސީ ހައްގުތަކަށް އިސްކަން ދޭންޖެހެ އެވެ. އަދި މި ކަންކަމަކީ ސަރުކާރުން އަވަސް ހައްލެއް ހޯދަންޖެހޭ މައްސަލަތަކެއްކަން އާތިފް ފާހަގަކުރެއްވި އެވެ.
އިއްޔެ ރައީސް މުއިއްޒު ވިދާޅުވެފައި ވަނީ ދުންފަތުގެ އިސްތިއުމާލު ކުރުން ހުއްޓާލާ ރަށްރަށުގެ ރައްޔިތުންނަށް ހާއްސަ އެލަވަންސެއް ދިނުމަށް ދިރާސާއެއް ހަދައި އެކަމާ ގުޅޭ ކަރުދާހެއް ހުށަހެޅުމަށް ކަމާ ގުޅޭ ވަޒީރުންނަށް އިރުޝާދު ދެއްވާފައިވާ ކަމަށެވެ.
